ज्येष्ठ नागरिकलाई फाइबर सिरक वितरण

बैजनाथ ९ माघ : केहीदिन यता बाँकेमा चलेको शीतलहर र हुस्सुका कारण अत्यधिक जाडो बढेर जनजीवन प्रभावित बनेपछि जिल्लाका स्थानीय सरकारहरुले ज्येष्ठ नागरिकलाई न्यानो फाइबर सिरक वितरण गर्न थालेका छन् ।

सोही क्रममा चिसो अत्यधिक बढेकाले ज्येष्ठ नागरिक सबैभन्दा बढी प्रभावित भएको जनाउँदै बाँकेको बैजनाथ गाउँपालिकाले पालिकाभित्रका सात सय जना ज्येष्ठ नागरिकहरुलाई न्यानो कपडा र फाइबर सिरक वितरण गरेको छ ।

शीतलहरका कारण चिसो दिनदिनै बढ्दै गएपछि बैजनाथ गाउँपालिकाले ६९ र ७० वर्ष उमेर समूहका सात सय ज्येष्ठ नागरिकहरुलाई न्यानो कपडा र फाइबर सिरक वितरण गरेको बैजनाथ गाउँपालिकाका अध्यक्ष प्रकाशबहादुर शाहीले बताए ।

उनले चिसोबाट ज्येष्ठ नागरिक सबैभन्दा बढी प्रभावित भएको जानकारी आएपछि विपन्न, अति विपन्न र अन्य सबै ज्येष्ठ नागरिकलाई न्यानो कपडा र फाइबर सिरक वितरण गरिएको जानकारी दिए ।

चिसोका कारण कुनै ज्येष्ठ नागरिकले ज्यान गुमाउनु नपरोस् भनेर न्यानो कपडा वितरण गरिएको गाउँपालिकाले जनाएको छ ।

गाउँपालिकाका अनुसार न्यानो कपडा वितरण कार्यक्रम बैजनाथ–१ चिसापानी, २ डिगिया, ३ वैरहवा, ४ बानियाभार, ५ बनकटुवा, ७ पेडारी र वडा नम्बर–८ को कार्यालयमा आयोजित गरिएको थियो ।

कार्यक्रमहरुमा बैजनाथ गाउँपालिकाका अध्यक्ष शाही, उपाध्यक्ष निर्मला रोकाय, सामाजिक विकास समिति संयोजक भूमिसरा राना, महिला, बालबालिका र ज्येष्ठ नागरिक शाखा प्रमुख लक्ष्मी ज्ञवाली ढकाललगायतले न्यानो लुगा र सिरक वितरण गरेका थिए ।

यसअघि चिसो बढ्दै गएपछि गाउँपालिकाले ठाउँ ठाउँमा निःशुल्क दाउरा वितरण गरेर आगो ताप्ने व्यवस्था मिलाइसकेको बैजनाथ गाउँपालिका उपाध्यक्ष निर्मला रोकायले बताए।

उनले बैजनाथ गाउँपालिकाले ज्येष्ठ नागरिकलाई निःशुल्क एम्बुलेन्स सेवा र निःशुल्क स्वास्थ्य बिमा पनि प्रदान गर्दै आएको जानकारी सो अवसरमा दिइन् ।