खजुराको पालिका गान विवादमा : प्रतिष्ठानका दुई जनाले दिए राजीनामा

नेपालगन्ज २९ वैशाखः बाँकेको खजुरा गाँउपालिकाले हालै सार्वजनिक गरेको पालिका गानको विवादका कारण प्रज्ञा प्रतिष्ठानका दुई सदस्यले राजीनामा दिन बाध्य भएकाछन् । पालिका स्तरीय प्रज्ञा प्रतिष्ठानमा मनोमानी बढे भन्दै दुई जना प्रतिष्ठानका सदस्यहरुले राजीनामा दिएका हुन् ।

पालिका गान छनोट र सार्वजनिकमा सदस्यहरुलाई जानकारी नै नदिई एकल निर्णयबाट मनोमानी गरिएको भन्दै प्रतिष्ठानका सदस्य कल्पना पौडेल ‘जिज्ञासु’ र माधव शर्माले राजीनामा दिएको जनाएका छन् । 

प्रतिष्ठान सञ्चालनमा उपकुलपतिमा आर्थिक पारदर्शिता नभएको, सामूहिक निर्णय नगरि एकल मनोमानी सञ्चालन गर्ने गरिएको तथा पालिका गानको छनोट र सार्वजनिकलाई निर्णय प्रक्रियामा नै नलगि विवादीत बनाएको भन्दै आफु सहित २ जनाले राजीनामा दिएको प्रतिष्ठानका सदस्य माधव शर्माले जानकारी दिए । प्रतिष्ठानकी सदस्य पौडेलले पनि पालिका गान सार्वजनिक विवादमा परेपछि आफुहरु सहभागी नै नरहेको विषयमा प्रतिष्ठानको नाम आएपछि राजीनामा दिएको जनाइन् ।

जननिर्वाचित पदाधिकारीको कार्यकाल सकिन एक वर्ष बाँकी रहँदा सार्वजनिक भएको बाँके खजुरा गाँउपालिकाको पालिका गान विवादमा परेको छ । मुल रचनाकारको नाममा थप ३ जना रचनाकारको ‘नाम थप’ भएर पालिका गान सार्वजनिक भएपछि सो पालिका गान विवादमा परेको हो ।

 यो पनि खजुराको पालिका गान सार्वजनिक, लोगो निर्माण गरिदैँ

आफ्नो रचनामा संगीत भरेर सार्वजनिक गर्नेक्रममा थप ३ जना रचनाकारहरुको नाम थपेर आफ्नो बौद्धिक सम्पत्तिमा अन्याय भएको भन्दै साहित्यकार बोधराज प्याकुरेलले वैशाख दोस्रो हप्ता नै खजुरा गाँउपालिकामा निवेदन दिएका थिए । प्रतिष्ठानका कुलपति एवं पालिका अध्यक्षलाई संबोधन गरेर बुझाईएको निवेदन उपर २ हप्ता बढी हुँदा पनि कुनै निर्णय नगरिएको साहित्यकार प्याकुरेलले बताए ।

उनले खजुरा गाँउपालिकाले गठन गरेको खजुरा प्रज्ञा प्रतिष्ठानले पालिका गानका लागि रचना आह्वान गरेकोमा आफ्नो रचना छनौटमा परेको र त्यसलाई संगीत सृजना गर्ने क्रममा गरिएको सम्पादनलाई प्रज्ञा प्रतिस्ठानका पदाधिकारीले आफुहरु समेत रचनाकार उल्लेख गरेर गान सार्वजनिक गरेको आरोप लगाए ।

कुलपति समेत रहेका पालिका अध्यक्ष डम्बर विक तुफानले पालिका गानको सम्बन्धमा विज्ञहरु राखेर निर्णय गर्नुपर्ने बताए । उनले संगीत र कला क्षेत्रका विज्ञहरुसँग राय लिएर विवाद समाधान गर्न आफुले सम्बन्धित निकायलाई निर्देशन दिइसकेको जानकारी दिए ।

उनले आफु समेत संलग्न रहेर मुल रचनालाई सम्पादन गरिएको तर, सार्वजनिक गर्ने बेला ४ जना रचनाकारको नाम राखेर सार्वजनिक गरिएको बताए ।

गत वैशाख १४ गते खजुरा गाउँपालिकाको सभा हलमा भएको पालिका गान सार्वजनिक कार्यक्रममा खजुरा प्रज्ञा प्रतिष्ठानका उपकुलपती डा. इन्द्र बहादुर भण्डारी, बोधराज प्याकुरेल, मणीरत्न अर्याल र इश्वरी रिजालको शब्द, रचना र सम्पादन तथा संगीत संयोजन विवी अनुरागीले गरेको बताइएको थियो ।