जमुनाहमा सशस्त्रको बीआइटी टोली परिचालन

नेपालगन्ज १२ साउन : नेपाल–भारत सीमानाका जमुनाहमा सशस्त्र प्रहरी बलको बोर्डर इन्ट्रयाक्सन (बीआइटी) टोली परिचालन गरिएको छ ।

सीमामा आवतजावतलाई सहज बनाउन, मानव बेचबिखन नियन्त्रण गर्न तथा लागूऔषध र अवैध सामान ओसारपसार रोक्ने उद्देश्यले सशस्त्र प्रहरी बल प्रधान कार्यालयको निर्देशनमा उक्त विशेष टोली आईतबारदेखि परिचालन गरिएको हो ।

देशका प्रमुख सीमा नाकाहरूमा परिचालन गरिएको बीआइटी टोली प्रत्येक स्थानमा सशस्त्र प्रहरी नायब निरीक्षकको नेतृत्वमा १४ सदस्यीय रहने व्यवस्था गरिएको सशस्त्र प्रहरी बल नेपाल नं. ३० गण बागेश्वरीले जनाएको छ ।

सो टोली बिहान ६ बजेदेखि साँझ ८ बजेसम्म सशस्त्र प्रहरी प्रधान कार्यालयले उपलब्ध गराएको बीआइटीको आधिकारिक पोशाकमा खटिनेछ । प्रत्येक सिफ्टमा एक महिला सशस्त्र प्रहरी कर्मचारी समेत खटिने व्यवस्था गरिएको छ ।

सशस्त्र प्रहरी बल नेपाल नं. ३० गण बागेश्वरी बाँकेका प्रमुख प्रहरी उपरीक्षक भीमबहादुर चन्द, सशस्त्र प्रहरी नायब उपरीक्षक मोहन बिष्ट, सीमा सुरक्षा गुल्म जमुनाहका प्रमुख प्रहरी नायब उपरीक्षक तीर्थ न्यौपाने तथा बिओपी जयसपुरका शसस्त्र प्रहरी निरीक्षक हिमाल केसीको उपस्थितिमा बीआइटी टोलीले आईतबारबाट औपचारिक रूपमा जिम्मेवारी सम्हालेको हो ।

बीआइटी टोलीको मुख्य जिम्मेवारी सीमा क्षेत्रमा आवतजावत गर्ने सर्वसाधारणलाई सहज सेवा उपलब्ध गराउनुका साथै मानव बेचबिखन तथा ओसारपसारका घटनाको रोकथाम, उद्धार र सूचना सङ्कलन गर्नु हो ।

साथै, प्रतिबन्धित लागूऔषध, अवैध सामान तस्करी तथा अन्य सीमा अपराधमाथि निगरानी बढाई आवश्यक कारबाहीमा सहयोग गर्ने जिम्मेवारी पनि टोलीलाई दिइएको सशस्त्र प्रहरी बल नेपाल नं ३० गण बागेश्वरी बाँकेका शसस्त्र प्रहरी उपरीक्षक चन्दले जानकारी दिए ।

उनले भने, ‘बीआइटी टोली परिचालन सीमा नाकामा आवश्यक थियो, अब टोली परिचालनपछि सीमा नाकामा हुने हरेक गतिविधिमाथि निगरानी गर्न सजिलो हुनेछ । यसबाट अन्तरराष्ट्रिय नाकामा हुने गरेको अवैध गतिविधिमाथि नियन्त्रण गर्न समेत सकिने छ ।’

प्रधान कार्यालयबाट प्रत्यक्ष परिचालन गरिए पनि बाँकेको जमुनाहमा बीआइटी सशस्त्र प्रहरी बल नेपाल नं ३० गण बागेश्वरी बाँकेको समन्वय तथा निर्देशनमा परिचालन हुने छ ।

बीआइटीको परिचालनसँगै जमुनाह सीमा नाकाको सुरक्षा व्यवस्था थप प्रभावकारी हुने, अवैध गतिविधि नियन्त्रण गर्न मद्दत पुग्ने तथा सीमावर्ती क्षेत्रमा नागरिकमैत्री सुरक्षा सेवा प्रवाह अझ सुदृढ हुने विश्वास गरिएको छ ।